ગુરુવારે તમે હાજરી ના પૂરો તો ગમતું નથી (જીંદગી)

કારણ વગર કઈ પણ અહી બનતું નથી,
કારણ બન્યું એવું મને ગમતું નથી.

વિચિત્રતા કેવી હશે એ બાગની ?
ફળ વૃક્ષને આવ્યા છતાં નમતું નથી!

આશ્ચર્યમાં છે પાનખર ને ઝાડ પણ,
પીળું થયું પણ પાંદડું ખરતું નથી! 

બાકી હશે શું આખરી ઈચ્છા કશી ?
તો કેમ આ મડદું હજી બળતું નથી?

આ ભીડ ફેંદીને ઘણો થાકી ગયો,
મારું જ સરનામું મને મળતું નથી.

પર્વતને પણ દુઃખે છે આજે પેટમાં,
પરગટ થયું ઝરણું છતાં ઝરતું નથી.

ક્યાં જીંદગી અટવાઈ? મારો હાથ જો,
રેખાઓમાં ‘મંથન’ નસીબ જડતું નથી!
- મંથન ડીસાકર (સુરત)